Teori Drama

 DRAMA

1.     Definisi: kahirupan anu dipintonkeun ngaliwatan gerak di luhureun panggung.

2.     Unsur-unsur  anatomi drama

a.     Prolog, nya eta: panganteur jalanna carita

b.     Babak/efisode, nya eta: bagian tina drama anu eusina ngandung hiji puseur kajadian

c.      Adegan: bagian tina babak nu ditandaan ku asup jeung kaluarna tokoh carita.

d.     Efilog: panutup jalanna carita

e.     Dialog: obrolan nu dilakukeun ku dua urang atawa leuwih

f.       Monolog: paguneman diri (ngomong sorangan)

-         Solilukui: monolog anu ditujukeun ka dirina sorangan

-         Aside: monolog anu ditujukeun ka penonton

g.     Setting: tempat jeung waktu kajadian

h.     Karakter:

a.     Protagonis: pasifatan tokoh paluku nu dipikaresep ku nu lalajo

b.     Antagonis: pasifatan tokoh carita anu teu dipikaresep ku nu lalajo

c.      Tritagonis: pasipatan tokoh carita nu jadi panyaimbang tokoh antagonis jeung protagonis

i.        Dekorasi : tata panggung

j.       Tata suara: sora musik atawa karawitan nu digunakeun pikeun mirig carita

          k.   Tata busana : pakean nu dipake ku tokoh carita.

CONTO BIANTARA

 TEKS  BIANTARA BASA SUNDA

 

 

            Assalamu’alaikum  Wr. Wb.

 

            Langkung ti payun   ngahaturkeun nuhun ka Panata Acara anu parantos masihan lolongkrang ka simkuring kanggo biantara dina ieu pasanggiri.

           

Kapihatur, Ka Kwarcab Kab. Bogor, salaku Pangjejer Pramuka  anu  Ku Simkuring dipihormat, 

           

Kapihatur, Pupuhu Panitia LT III Kab. Bogor miwah rengrenganana anu Ku Simkuring dipihormat,

 

Kapihatur, Rengrengan Kaka Pembina anu Ku Simkuring dipihormat,

 

           

            Waktos nampi bewara yen Kwarcab Kab. Bogor bade ngayakeun biantara dina        LT III, Simkuring ngaraos pisan reueus, wirehna para inohong Pramuka anu aya di Bogor henteu aya kasuda dina  ngamumule titinggal karuhun Sunda. Apan Bogor teh tos kawentar mangrupa wewengkon karajaan Pajajaran, anu masarakatna danget harita mangrupa masarakat anu pinunjul.

            Nyoko kana tema anu didugikeun ku rengrengan Calagara, Simkuring bade nyobian medar ngenaan Pramuka jeung lingkungan hidup atawa numutkeun basa Sunda mah lingkungan pakumbuhan.

            Para Pamilon Pasanggiri Basa Sunda, anu ku Simkuring dipihormat,

Milarian identitas atawa jati diri Pramuka nu aya di Bogor teh kacida pisan sesahna. Esensi jeung eksistensi jati diri Pramuka, kacida pisan pentingna lamun ditalungtik, diteuleuman atawa diulik deui. Saha jeung kumaha ari Pramuka dina ngokolakeun lingkungan hirupna teh ?

            Geura urang sasarengan naratas jeung nyawang mangsa katukang, urang nyukcruk galur mapay raratan Pramuka.

            Gerakan pramuka salaku wadah organisasi kacida pisan pentingna pikeun ngabeungkeut jeung ngaronjatkeun kreativitas para nonoman, boh putra atanapi putrina. Lian ti eta, gerakan pramuka teh ti kapungkur keneh tos jadi jejer dina ngarawat katut ngariksa kaayaan alam Indonesia, utamana nu aya di wewengkon Bogor. Tos teu bireuk deui anggota pramuka mah  sok ngiring ancrub dina ngamumule lingkungan, boh nu mangrupa melakan leuweung anu ruksak atawa ngilu ancrub dina ngaberesihan lingkungan sosial masarakat anu kurang merenah.

            Pikeun tetep nanjeurkeun eksistensi pramuka dina ngariksa jeung ngamumule lingkungan hirup anu hade, di antarana:

1.      Kudu jadi Pramuka Sajati,.Para Pangaping Pramuka kedah ngabina jeung ngatik murangkalih dina kahirupan di sakola. Lamun tiasa mah gerakan pramuka teh kudu janten ekstrakurikuler nu utama.

2.      Pikeun ngahontal karaharjaan bangsa, Para nonoman Pramuka kudu parigel  boh ku elmu pangaweruh, boh  ku kabinangkitan sejenna.. Tos waktuna urang salaku anggota pramuka mangsa kiwari ngilu ancrub kana widang pangwangunan bangsa.

3.      Nu kacida pisan pentingna dipibanda ku para anggota salaku kader Pramuka, pikeun ngahontal karaharjaan Bangsa, yen pramuka teh kudu  mibanda jati diri, nya eta kudu cageur, bageur,bener, pinter,  singer, wanter, teger, tur cangker.  sarta kudu diwuwuhan ku hade gogog hade tagog. Anu hartina anggota pramuka teh kudu mibanda basa jeung laku lampah anu hade.

            Dumasar kana wincikan tadi, tos tetela yen pramuka teh mibanda kalungguhan anu kacida pisan pentingna dina ngamumule lingkungan pakumbuhan sarta ngawujudkan kapribadian bangsa.

Mung sakieu wae biantara ti Simkuring, neda hapunten bilih seueur kalepatan. Hapunten bilih langkung saur,bahe carek, dina nyusun basa anu didugikeun kirang entep seureuhna.

Cag!

Urang teundeun di handeuleum sieum,

Urang tunda di hanjuan siang,

Paranti nyokot ninggalkeun.

 

Wabillahi taufiq wallhidayah,  Wassalamu’alaikum  Wr. Wb.

 

 

                                                                                    Priyatna Windya Giri

                                                                                    Pangkalan SMP N 1 Dramaga

BIANTARA (PIDATO)

 

BIANTARA

1.  Definisi :  kedalan pikeun nepikeun informasi jeung tujuan anu tangtu ka jalma loba.

2. Struktur/sistematika biantara

            a.  Bubuka biantara

            b.  eusi biantara

            c.  Panutup biantara

3.  Rupa – rupa Biantara

a.  Biantara Kanagaraan

b.  biantara pangbagea poe nu tinangtu

c.  biantara dina hiji acara

d. biantara  ngaronjatkeun sumanget.

4.  Tujuan Biantara

            a.  Mangaruhan batur sangkan daek nuturkeun kahayang nu biantara

            b.  Nepikeun informasi ka balarea

            c.  Mere beja ka balarea pikeun mere sumanget jeung ngagumbirakeun

5.  Jenis – jenis Biantara

a. Biantara Bubuka, nya eta biantara anu cindek dilakukeun ku MC atawa pembawa acara

b. Biantara Pangarahan, nya eta biantara anu eusina mere luang dina hiji pasamoan

c.  Biantara pangbagea, nya eta biantara  anu ditepikeun dina acara kagiatan mapag hiji acara.

d.  Biantara Peresmian, nya eta biantara anu dilakukeun ku hiji tokoh dina hiji acara anu tangtu.

e.  Biantara Laporan, nya eta biantara nu ditepikeun ku hiji panitian dina hiji kagiatan

f.  Biantara pertanggungjawaban, nya eta biantara pikeun nepikeun hiji pertanggungjawaban resmi.

6. Teknik/Padika Biantara

a.  Teknik ngapalkeun biantara jadi pidato hapalan

b.  Teknik biantara saujratna/langsung, nya eta teknik biantara  anu saujratna dumasar kana pangalaman jeung wawasan nu biantara

c.  Biantara Naskah, nya eta biantara ku cara maca naskah nu tos disiapkeun dina acara resmi

7. Hal – hal anu kudu dititenan dina Biantara

a.  Sora/vokal kudu bentes tur jelas

b.  Lentong jeung wirahmana kudu merenah

c.  kudu merhatikeun adat sunda

d.  kudu mibanda pangaweruh anu jembar

e.  kudu bisa ngareka basa ngareka basa nu hade, tur laku lampah anu merenah

f.  kudu mibanda laku humoris dina acara biantara anu tinangtu.

Struktur fonem basa Sunda

  STUKTUR

 

1.1.    Fonologi

Fonologi nya éta widang elmu  basa anu nalungtik ngenaan fonem. Sacara gurat badag fonologi ngawengku dua widang garapan, nya éta fonetik jeung fonemik.

Fonetik nya éta widang elmu  basa anu nalungtik ngenaan sora-sora basa anu aya dina ucapan (parole). Sedengkeun  ari fonemik nya éta widang fonologi anu nalungtik ngeunaan fonem-fonem.

Fonem nya éta sora basa anu pangleutikna nu ngabedakeun harti. Fonem dina basa Sunda aya dua rupa, nya éta fonem vokal jeung fonem konsonan.

 

 1.1.1. Fonem vokal

            Dina basa Sunda vokal téh aya tujuh, nya éta;  a,  e,  u, o, i,  e’,  jeung  eu . Dina ngawangun kecap vokal téh bisa nempatan posisi di awal, di tengan jeung di tungtung, iwal ti vokal   “ e “ anu ngan bisa nempatan posisi di awal jeung di tengah wungkul.

            Geura urang titenan contona !

 

Vokal	awal	tengah	tungtung	Katerangan
A	anduk	palay	Nangka
I	imah	pindah	Konci
U	uncal	kusir	Palu
e'	elmu	semah	Sare
O	oray	loba	Kilo
E	engkol	bengal	-	Teu bisa ditungtung
Eu	eusi	beunghar	Henteu

 

 

 

 

 

 

 

 

 

 

 

 

 

 

 

 

1.1.2.      Vokal  ngantet

Vokal ngantet nya éta vokal anu ngantet henteu kaselang kukonsonan. Vokal ngantet  aya dua rupa, nya éta vokal ngantet anu sarua, umpamana : aa, ii,  uu, oo, jeung vokal ngantet anu teu sarua, umpamana: au, ai, au, ea, jeung sajabana.

 

Geura urang titenan contona ieu di handap !

 

Vokal ngantet nu sarua	Conto              kecap\ morfem	Vokal ngantet  nu teu sarua	Conto               kecap \ morfem
Ii	Tiis	Ia	Miang
Ee	hees, tees	Ie	Rieg
Aa	Caang	Iu	Hiu
Uu	Buuk	Io	Lio
Oo	Toong	Ieu	Rieut

 

1.1.3.  Fonem Konsonan

Fonem konsonan basa Sunda ngawengku fonem: h, n, c, r, k, d, t, s, w, l, p, j, y, ny, m, g, b, ng.  Conto pamakean fonem konsonan dina kecap, di antarana bisa di titenan di handap ieu !

Konsonan	Awal	tengah	tungtung	Katerangan
H	Harga	tahu	Murah
N	Narik	bantal	Lawon
C	cangkir	gancang	-	Teu aya konsonan tungtung
R	Rieut	sirah	Lieur
K	kompor	saksi	Merak
D	daging	kuda	Kurud
T	tangkal	kentang	Petot
S	saderek	usup	Mamas
J	Jimat	gajih	-
Ny	Nyaba	nyair	-
M	munding	domaba	Ngosom

 

 

 

 

 

 

 

 

 

 

 

 

 

1.2.  Pola Engang

Pola engan nya éta kombinasai antara vokal jeung konsonan dina ngawangun engang. Jumlah engang (suku kata) dina unggal kecap téh henteu sarua, aya nu ngan saengang, dua engang, tilu engang, aya anu leuwih.  Geura urang titenan conto ieu di handap !

            Kah, tah, tuh, sok,                    :  saengang  ( teu bisa dirucat)

            da-har, nang-ka, sam-peu         :  dua engang

            ma-neh-na, in-dit-na                 :   tilu engang

            ka-ca-ma-ta, bo-bo-go-han       :   opat engang, jeung sajabana.

 

1.2.1.  Wangun fonem engang basa Sunda asli

            wangun fonem engang dina basa Sunda aya anu manrope sampakan (asli), jeung aya nu mangrupa  serepan tina basa asing, atawa disebut basa kosta. Wangun engang basa Sunda asli di antarana:

            1.  V                          :  a-ya,  i-eu, u-lin, eu-weuh, jsb

            2.  VK                       :  an-cin, in-dung, ang-kat, jsb

            3.  KV                       :  te-ko, re-a, ba-pa, ku-ya,

            4.  KVK                    :  ka-sur, ban-jar, un-cal,

            5.  KKV                    :  ti-bra, pra-ja, pra-muka

            6.  KKVK                 :  ra-cleng,  ra-jleng,- tu-bruk, jsb.                    

 

1.1.3.      Wangun fonem engang basa Sunda tina basa asing

Conto kecap anu mibanda pola engang tina basa asing, ngawengku:

            1. VKK                     :  eks-trim, eks-por,

            2.  KKKV                 :  stra-te-gi,

            3.  KKKVK              :  struk-tur,

            4.  KKVKK              :  trans-por-ta-si, kom-pleks

Jenis-jenis Kalimah

 

2.5.   Tata kalimah  (sintaksis)

 

2.5.1.      Warna kalimah dumasar kana unsur pangwangunna.

 

Warna kalimah dumasar kana unsur pangwangunna, kalimah téh aya nu disebut  kalimah sampurna, jeung lalimah teu sampurna. Sangkan leuwih jelas urang pedara wae di handap ieu!

 

2.5.1.1.   Kalimah sampurna

            Kalimah sampurna  nya éta kalimah anu diwangun ku hiji jejer (subjek) jeung hiji caritaan (predikat)  atawa leuwih, boh make katerangan, panglengkep, boh henteu.  Conto:

 

            a.   Rudi   keur  leumpang.

                   S                    p

 

            b.   Rina   keur  masak   sayur  haseum  di dapur  jeung Bi Ijah.

                    S                p                     o                 ket.                Pel.

 

 

2.5.1.2  Kalimah  teu  sampurna

Kalimah teu sampurna nya éta kalimah anu diwangun ku hiji klausa kauger (terikat), nu teu mibanda jejer.  Kalimah teu sampurna  biasana mangrupa  kalimah langsung, boh ti panyatur basa, boh ti paregep (penyimak).

Geura urang titenan contona!

a.   Ubed         :  “ Jang Uhe keur naon cicing di dinya ?” (sampurna)

      Uhe           :  “ Ngalamun”  (kalimah teu sampurna) 

      Ubed         :  “ Euleuh…” (kalimah teu sampurna)

 

b.  Aki             :  “Ieu téh bau naon?”  (teu sampurna)

     Nini            :  “Hitut….!”  (teu sampurna)

 

2.5.2.   Warna Kalimah Dumasar kana Frase Predikatna

            Jenis kalimah  dumasar kana kecap atawa frase predikatna ngawengku, kalimah barang, kalimah pagawean, kalimah sifat, jeung kalimah bilangan. Dina diktat ieu anu baris dipedar téh nya éta jenis kalimah pagawean.

 

 

2.5.2.1. Kalimah pagawean

Kalimah pagawean ngawengku;  (a) kalimah aktif,  (b)  kalimah pasif,  (c) kalimah reflektif, jeung  (d) kalimah resiprokatif.

            Kalimah pagawean, nya éta kalimah anu predikatna mangrupa  kecap atawa frase pagawean. Contona:

            a.  Budak téh   ngala  jambu. (predikatna kecap pagawean)

                        s              p         o

            b.  Si Benhur  keur  geuring ripuh .  (predikatna frase pagawean)

                        s                       p                 

 

 

 

 

1. Kalimah Aktif

            Kalimah pagawean aktif, ngawengku kalimah aktif transitif jeung kalimah pagawean aktif intransitif.

 

1).  Kalimah aktif transif

            Kalimah aktif  transitif, nya éta kalimah aktif anu predikatna  merlukeun objek. Contona:

            a.  Sinta keur ngundeur  daun sampeu.

                    S              p                    o

            b.  Mang Udin  Keur ngomean  Motor  Bebek

                          s                    p                     o

            c.  Budak teh keur maca

                  S            p

 

2). Kalimah aktif  intrasitif 

Kalimah aktif intransitif, nya éta kalimah  anu predikatna teu merlukeun objek. Conto:

 

a.  Budak téh sarena mani tibra.

        s               p           pel.

 

b.  Budak téh keur ceurik mani eueuriheun.

              S              p                   pel

 

b.  Neng Sinta  keur  seuseurian  sorangan.

          s               p                    pel.

2.  Kalimah pagawean  pasif 

 

Kalimah pagawean pasif nya éta kalimah pagawean anu predikatna mangrupa  kecap atawa frase pagawean pasif, sarta  subjekna/ jejerna kakeunaan ku pagawean. Kalimah pasif, biasana kecap pagaweanana make rarangken   hareup   di-  atawa rarangken hareup  ka-.

Contona:

a.       Cau ambon keur dipanggul  Bah Toha.

b.      Hayam jago  keur diparaban  Mang  Ibro.

c.       Tanteu  Susi katabrak beca.

3.  Kalimah pagawean reflektif

Kalimah pagawean reflektif, nya éta kalimah pagawean anu subjekna ngalakukeun pagawean keur kadirina sorangan.  Contona :

a.       Si Udin keur sibeungeut di pancuran.

b.      Ririn keur nyisiran bari dangdak-dengdek.

c.       Manaehna keur ngelapan kesang ku anduk leutik.

 

4.  Kalimah pagawean resifrokatif

 

Kalimah pagawean resiprokatif, nya éta kalimah pagawean anu subjekna ngalakukeun pagawean anu pabales-bales. Contona:

a.       Anjing jeung ucing silih udag.

b.      Si Japra jeung Si Jantuk patenggor-tenggor  di jero kelas.

 

 

 

2.5.2.2.  Kalimah Barang

            Kalimah barang nya éta kalimah anu predikatna mangrupa  kecap barang atawa frase barang. Conto:

            a.  Pa Maman  guru ngaji di Kampung Laladon.

                        S                 p                  ket.

            b.  Juragan Komar   bandar   hayam.

                           J                     p          O

            c.  Bu Tuti  dokter  di Puskesmas Gunung Salak

                      J             p                      Ket.

 

2.5.2.3.  Kalimah Sifat 

            Kalimah sifat, nya éta kalimah anu predikatna/caritaanana mangrupa kecap sifat atawa frase sifat. Conto:

            a.  Budak téh  mani pinter.

                       J                  C

            b.  Neng  Dewi   panggeulisna  di kampung Cinangka mah.

            J                     C                    Ket.

 

2.5.2.4.  Kalimah  Bilangan

       Kalimah bilangan nya éta kalimah anu predikatna/caritaanana mangrupa kecap bilangan atawa frase bilangan.

            a.   Nunung  rengking kahiji  di kelasna

                       J                   C                     Ket.

            b.  Buku Novel téh aya lima judul di perpustakaan.

                              J                    C     pel.            Ket.

 

2.5.3.   Warna Kalimah Dumasar kana Fungsina

            Warna atawa jenis kalimah dumasar kana fungsina, dibagi jadi tilu bagian, nya éta;  (1) kalimah wawaran,  (2) kalimah pananya,  (3) kalimah parentah.

 

1. Kalimah  Wawaran

            Kalimah wawaran nya éta kalimah anu fungsina pikeun mere beja atawa ngawawarkeun ka batur tanpa miharep jawaban anu tangtu. Conto :

            a. Barudak keur ucing-ucingan di buruan.

            b. Mang udin keur maraban hayam.

           

Ciri-ciri kalimah wawaran:

a.       nepikeun informasi kanu lian.

b.      Teu merlukeun jawaban anu langsung.

c.       Kalimahna ditungtungan ku tanda baca titik.

 

2. Kalimah Pananya

Kalimah pananya, nya eta kalimah anu fungsina pikeun nanyakeun hiji informasi, kalawan miharep respon atawa jawaban anu langsung. Conto:

a.       Saha Jang budak anu katabrak beca teh?

b.      Iraha Ma Ikem indit ka Jakartana?

Ciri-ciri kalimah Tanya:

a.  Nepikeun informasi, sarta miharep jawaban anu langsung.

b.  kalimahna ditungtungan  ku tanda baca pananya.

 

3.  Kalimah Parentah

            Kalimah parentah, nya eta kalimah anu fungsina pikeun nitah atawa marentah, anu merelukeun tindakan sacara langsung. Conto:

a.       “Cing pangnyandakeun kapur !”

b.      “ Ulah cicing di lawang panto, hareurin!”

 

Ciri-ciri kalimah parentah.

a.       Nepikeun parentah, sarta miharep tindakan anu langsung.

b.      Kalimahna make tanda kekenteng (tanda kutif).

            c.   Tungtung kalimahna make tanda baca panyeluk.